திருப்பூர் நொய்யல்ஆற்றில் வரலாறு காணா வெள்ளம்

by **நேசமுடன் ஹாசிம்** Mon 7 Nov 2011 - 7:35

திருப்பூரில் இது வரை இல்லாத அளவிற்குள் நொய்யலாற்றில் வெள்ளம் கரை புரண்டு ஓடியது. இதில் 100 க்கும் மேற்பட்ட குடிசை வீடுகள் தண்ணீரில் மூழ்கின, பல வீடுகள் தண்ணீரில் இழுத்து செல்லப்பட்டன. வெள்ள நீரில் சிக்கிய 10 பேர் மாயமானதாக அஞ்சப்படுகிறது.

தமிழகம் முழுவதும் கடந்த ஒரு வார காலமாக பருவமழை பெய்து வருகிறது. இதில் தமிழகம் முழுவதும் 30 க்கும் மேற்பட்டோர் பலியாயினர். சென்னையில் வடிகால் நிரம்பி பல்வேறு சாலை முழுவதும் தண்ணீர் குளம் போல தேங்கி நிற்கிறது. நெல்லை, குமரி, தூத்துக்குடி, கோவை, திருப்பூர், நீலகிரி, விழுப்புரம், தஞ்சாவூர், தேனி , மதுரை உள்ளிட்ட பகுதிகளில் தொடர் மழை காரணமாக அங்குள்ள அணைகள் நிரம்பி வருகிறது.

இந்நிலையில் திருப்பூரில் நேற்று இரவு 10 மணி முதல் பலத்த மழை விடிய, விடிய பெய்தது. கோவையில் பெய்த மழை மற்றும் மற்றும் அருகில் உள்ள குளங்கள் உடைந்ததாலும், நொய்யல் ஆற்றில் தண்ணீர் பெருக்கெடுத்து ஓடியது. இதனால் வெள்ளம் கரை புரண்டு பெரும் சேதத்தை ஏற்படுத்தியது.

150 பேரை மீட்ட இந்து முன்னணியினர் : ஜம்பனைபள்ளம், கே.வி.ஆர்.நகர், சத்யாநகர், தாராபுரம், சங்கிலிப்பள்ளம் ரோடு, டைமன்ட் தியேட்டர் உள்ளிட்ட பகுதிகளில் வெள்ள நீர் புகுந்தது. இதில் இரவு நேரத்தில் தூங்கி கொண்டிருந்த இப்பகுதி மக்கள் தங்கள் உடமைகளை விட்டு, விட்டு வெளியேறி மாற்று இடங்களில் தஞ்சம் புகுந்தனர். முத்தையாநகர் பகுதியில் 150 பேரை இந்து முன்னணியினர் மீட்டு பத்திரமான இடத்திற்கு கொண்டு வந்தனர்.

பெண் உடல் மீட்பு : இரவு நேரத்தில் குடிசைகள் தண்ணீரில் சென்றதில் 10 பேர் வெள்ளத்தில் இழுத்து செல்லப்பட்டிருக்கலாம் என அஞ்சப்படுகிறது. ஒரு பெண் சடலம் மீட்கப்பட்டுள்ளது. குன்னங்கால்பாளையம், கடல்பாளையம் என்ற இரு குட்டைகளும் நிரம்பி உடைப்பு ஏற்பட்டது . இந்த நீரும் நொய்யல் ஆற்றில் சென்றதால் வெள்ளபெருக்கு அதிகரித்தது என அங்கிருக்கும் நமது நிருபர் தெரிவிக்கிறார். 5 ஆடுகள் இறந்து விட்டன. வெள்ளம், மழை காரணமாக திருப்பூர் மாவட்டத்தில் பள்ளிகளுக்கு இன்றும் , நாளையும் விடுமுறை அறிவிக்கப்பட்டுள்ளது.

வைகை ஆற்றில் வெள்ள அபாயம்: வைகை அணை நிரம்பிவருவதால் அணையில் தண்ணீர் திறந்து விடப்பட்டுள்ளது. இத்துடன் மழை நீடிக்கும் படசத்தில் வெள்ள அபாயம் ஏற்படும். இதனால் தேனி, மதுரை, சிவகங்கை, ராமநாதபுரம் மாவட்ட கøரேயார மக்கள் பாதுகாப்பாக இருக்கும்படி எச்சரிக்கை விடப்பட்டுள்ளது.