பெரியாறு அணை விவகாரம்: மற்றொரு வாலிபர் தற்கொலை

பெரியாறு அணை விவகாரம்: மற்றொரு வாலிபர் தற்கொலை
சின்னமனூர்,
முல்லைப்பெரியாறு அணை பிரச்சினைக் காக வாலிபர் விஷம் குடித்து தற்கொலை செய்து கொண்டார். பெரியாறு அணை பிரச்சினை காரணமாக தேனி மாவட்டத்தில் கடந்த 24 நாட்களாக பல்வேறு போராட் டங்கள் நடந்த வண்ணம் உள்ளன. நேற்று முன்தினம் கேரள அரசை கண்டித்து தேனி மாவட்டம் சின்னமனூரில் 20,000 பேர் பங்கேற்ற பிரமாண்ட பேரணி நடந்தது.

இதில் சின்னமனூர் கஸ்பாரோட்டை சேர்ந்த சின்னராஜ் மகன் ராமமூர்த்தி (36) கலந்து கொண்டார். இவர் விஷ விதைகளை சாப்பிட்ட பிறகே ஊர்வலத்தில் நடந்து வந்துள்ளார்.

இந்நிலையில், தலைசுற்றல் எடுக்கவே உடனடியாக ராமமூர்த்தி வீட்டுக்கு சென்று வாந்தி எடுத்துள்ளார். அவரிடம் சகோதரி தமிழ்செல்வி விசாரித்த போது, முல்லைப்பெரியாறு அணை பிரச்சினையில் இதுவரை தீர்வு கிடைக்காததால் விஷம் சாப்பிட்டதாக தெரிவித்துள்ளார். உடனே அவரை அம்பியூலன்சில் தேனி மருத்துவக் கல்லூரி மருத்துவமனைக்கு கொண்டு சென்றனர்.

ஆனால் செல்லும் வழியிலேயே அவர் இறந்தார். அவரது சட்டைப் பையில் கலெக்டருக்கு ஒரு கடிதம் இருந்தது. அதில் முல்லைப்பெரியாறு அணை விவகாரத்தில் தமிழகத்தின் உரிமையை ஒரு போதும் விட்டுக் கொடுக்கக் கூடாது. இப்பிரச்சினையில் உடனடியாக நடவடிக்கை எடுக்க வேண்டும் என எழுதியுள்ளார். இதனை பொலிஸார் கைப்பற்றினர்.

அங்கு வந்த உறவினர்கள், அப்பகுதியை சேர்ந்தவர்கள் பொலிஸாருடன் கடிதத்தை தருமாறு வாக்குவாதத்தில் ஈடுபட்டனர். அப்போது பொலிஸார் முல்லைபெரியாறு அணைப் பிரச்சினைக்காக தற்கொலை செய்து கொண்டதாக எப்.ஐ.ஆர். பதிவு செய்து கொள்வதாக தெரிவித்தனர். அவரது உடல் தேனி மருத்துவக் கல்லூரி மருத்துவமனையில் வைக்கப்பட்டுள்ளதால் அங்கு ஏராளமானோர் குவிந்தனர். இதனால் அங்கு பொலிஸார் குவிக்கப்பட்டனர்.

தற்கொலை செய்து கொண்ட ராமமூர்த்திக்கு திருமணமாகவில்லை. இவருக்கு சகோதரி தமிழ்செல்வி, சகோதரர்கள் வேலுசாமி, முருகன், செந்தில்குமார் ஆகியோர் உள்ளனர். இவரது பெற்றோர் இறந்து விட்டதால் அண்ணன் வீட்டில் தங்கி பித்தளை பாத்திரங்கள் செய்யும் தொழில்செய்து வந்தார்.

சின்னமனூர் அருகே சீலையம்பட்டியை சேர்ந்த சேகர் என்ற தே.மு.தி.க. பேச்சாளர் கடந்த சில நாட்களுக்கு முன்பு விருத்தாச்சலத்தில் இதே பிரச்சினைக்காக விஷம் குடித்து இறந்தார். நேற்று முன்தினம் ராமமூர்த்தி இறந்துள்ளார். கடந்த வாரம் தேனி அருகே இதே பிரச்சினைக்காக 2 பேர் தீக்குளித்தனர். அவர்கள் உயிருக்கு ஆபத்தான நிலையில் மதுரை அரசு மருத்துவமனையில் சிகிச்சை பெறுகின்றனர்.

முல்லை பெரியாறு அணைக்கு பதிலாக புதிய அணை கட்டுவதை தவிர வேறு வழியில்லை என்று கேரள முதல்வர் உம்மன் சாண்டி தொடர்ந்து கூறி வருகிறார். புதிய அணை கட்டுவதற்கான இடத்தை ஏற்கனவே, தேர்வு செய்து நிதியும் ஒதுக்கி விட்டனர். இந்நிலையில் பூமி பூஜையை எப்போது வைத்துக் கொள்ளலாம் என்று ரகசியமாக ஆலோசனை நடத்தப்பட்டதாக கூறப்படுகிறது. இதில், 2012 ஜனவரி 1ல் பூமி பூஜை நடத்த கேரளா திட்டமிட்டுள்ளதாக தகவல் பரவியது.

இந்நிலையில் கேரள அரசு புதிய அணைக்கு பூமி பூஜை நடத்தினால் 2012 ஜனவரி 1ம் திகதியை கறுப்பு தினமாக அறிவித்து, புத்தாண்டு கொண்டாட்டங்களை கைவிட தேனி மாவட்டத்தின் பல்வேறு விவசாய அமைப்பினர் முடிவு செய்துள்ளனர்.

ஏன் இப்படி முட்டாள் தனமா நடக்குராங்க