வட கொரியாவில் சிறைக் கைதிகளுக்கு பொது மன்னிப்பு

by *சம்ஸ் Wed 11 Jan 2012 - 6:31

மறைந்த வட கொரிய தலைவர் கிம் ஜொங் இல்லின் பிறந்த தினத்தை முன்னிட்டு சிறைக் கைதிகளுக்கு பொதுமன்னிப்பு வழங்கவுள்ளதாக அந்நாட்டு அரச ஊடகமான கே. சி. என் ஏ. செய்தி வெளியிட்டுள்ளது. இதன்படி பெப்ரவரி முதலாம் திகதி சிறைக் கைதிகளுக்கு பொது மன்னிப்பு வழங்கப்படும் என அறிவிக்கப்பட்டுள்ளது.

எனினும் எவ்வாறான சிறைக் கைதிகள் மற்றும் கைதிகளின் எண்ணிக்கை குறித்து தகவல் வழங்கப்படவில்லை.

வட கொரியாவில் சுமார் 2 இலட்சம் அரசியல் கைதிகள் தடுத்து வைக்கப்பட்டுள்ளதாக சர்வதேச மன்னிப்புச் சபை குறிப்பிட்டுள்ளது.

வடகொரியா இதற்கு முன்னர் கடந்த 2005 ஆம்ஆண்டு ஜப்பான் காலனித்துவத்தின் 60ஆம் ஆண்டு நிறைவை முன்னிட்டு சிறைக்கைதிகளுக்கு பொது மன்னிப்பு வழங்கியது.

அதற்கு முன்னர் 2002ஆம் ஆண்டு பொது மன்னிப்பு வழங்கப்பட்டது. எனினும் அதன்போதும் எத்தனை கைதிகளுக்கு பொது மன்னிப்பு வழங்கப்பட்டது என்பது குறித்த விபரம் வெளியிடப்படவில்லை.

ஏற்கனவே வட கொரியாவில் சிறைச்சாலைகளின் எண்ணிக்கை அதிகரித்து வருவதாக மன்னிப்புச்சபை கடந்த ஆண்டில் குற்றம்சாட்டி இருந்தது. கடந்த 1994ம் ஆண்டு முதல் வடகொரிய தலைவர் கிம் ஜொங் இல் கடந்த மாதம் 17 ஆம் திகதி மாரடைப்பால் மரணமடைந்தார். அவரைத் தொடர்ந்து அவரது மகன் கிம் ஜொங் உன் புதிய தலைவராக நியமிக்கப்பட்டுள்ளார்.