மக்கள் பூச்சி புழுக்களை உட்கொள்வதற்கு பழகிக் கொள்ள வேண்டும் - ஆய்வு

மக்கள் பூச்சி புழுக்களை உட்கொள்வதற்கு பழகிக் கொள்ள வேண்டுமென டச்சு விஞ்ஞானியான ஆர்னோல்ட் வான் ஹியூஸ் (Arnold Van Huis) ஆலோசனை வழங்கியுள்ளார். உலக உணவுப் பிரச்சினைகளை தீர்ப்பதற்கு பூச்சு புழுக்கள் சிறந்த தீர்வுத் திட்டமாக அமையும் என தெரிவித்துள்ளார்.

பழைய உணவுப் பழக்க வழக்கங்களிலிருந்து மீள்வதற்கான காலம் மலர்ந்துள்ளதென அவர் குறிப்பிட்டுள்ளார். விவசாய உற்பத்தி வீழ்ச்சி, காலநிலை மாற்றம், சனத் தொகை அதிகரிப்பு, கைத்தொழில் மயமாக்கல் போன்ற பிரச்சினைகளுக்கு பூச்சி புழுக்களை உணவாக உட்கொள்வதன் மூலம் தீர்வு காண முடியும் என அவர் தெரிவித்துள்ளார்.

பூச்சி புழுக்களை உணவாக உட்கொள்வதில் சிறுவர்களுக்கு சிக்கல் இருக்காது என அவர் சுட்டிக்காட்டியுள்ளார். வளர்ந்தவர்களின் மனோ நிலையே பூச்சிப் புழுக்களை உட்கொள்ள முடியாமைக்கான காரணமாகும் என அவர் தெரிவித்துள்ளார்.

மெக்ஸிக்கோ மற்றும் தாய்லாந்து போன்ற நாடுகளில் மிக நீண்ட காலமாக பூச்சிப் புழுக்கள் உணவாக உட்கொள்ளப்படுவதாகத் தெரிவிக்கப்படுகிறது.

பேராசிரியர் ஆர்னோல்ட் வெகனின்ஜன் பல்கலைகத்தின் விரிவுரையாளராக கடமையாற்றி வருகின்றமை குறிப்பிடத்தக்கது.

கால்நடைகளை விடவும் பூச்சிப் புழுக்களில் அதிகளவு புரதச் சத்து காணப்படுவதாகவும், பூச்சிப் புழுக்கள் குறைந்தளவான நீரைப் பயன்படுத்துவதாகவும் தெரிவிக்கப்படுகிறது. பூச்சிப் புழு உணவு வகைகளை பிரபல்யபடுத்தும் முனைப்புக்களை மேற்கொண்டு வருவதாக பேராசிரியர் ஆர்னோல்ட் தெரிவித்துள்ளார்.