ஒரு ரன் எடுக்க ரொம்ப நேரம் போராடி ஒரு வழியாக 'கன்னி' வெற்றியைப் பறித்த இந்தியா!

மெல்போர்ன்: அடேங்கப்பா, என்ன ஒரு உற்சாகம், என்ன ஒரு கொண்டாட்டம். மெல்போர்ன் மைதானத்தை இந்திய ரசிகர்கள் இன்று தங்களது குஷியான கோஷத்தால் அதிர வைத்து விட்டனர். அதற்குக் காரணம், ஆஸ்திரேலியாவுக்கு வந்துள்ள இந்திய அணி இன்று தனது முதல் வெற்றியைப் பதிவு செய்ததே. ஆனாலும் 'கிரேட்' வெற்றி என்று சொல்ல முடியாமல் 'கிரேட் எஸ்கேப்' வெற்றி என்ற நிலைக்கு நமது ஆட்டக்கார்கரர்கள் கடைசி நேரத்தில் டென்ஷனாக்கி வெற்றி பெற்றனர்.

கிட்டத்தட்ட ஒரு மாதத்திற்குப் பிறகு வந்த முதல் வெற்றி என்பதால் ஒட்டுமொத்த கிரிக்கெட் ரசிகர்களும் 'புல்' சந்தோஷத்தில் மூழ்கிப் போயுள்ளனர்.

டெஸ்ட் தொடரில் படு தோல்வி அடைந்த இந்தியா இந்திய ரசிகர்களின் ஒட்டுமொத்த வசவுகளையும் வாரி சுருட்டிக் கொண்டது. சரி அது போகட்டும், டுவென்டி 20 போட்டியிலாவது இந்தியா அசத்தும் என்று எதிர்பார்த்த நிலையில் முதல் டுவென்டி 20 போட்டியில் தோல்வியைச் சந்தித்தது இந்தியா.

இந்த நிலையில் இன்று மெல்போர்ன் மைதானத்தில் 2வது போட்டி நடைபெற்றது. இதிலாவது இந்தியா வென்றால் தொடரை சமன் செய்யலாமே என்ற ஆசையுடனும், ஒருவித எதிர்பார்ப்புடனும் ரசிகர்கள் மைதானத்தில் அலை மோதினர்.

இப்போட்டியில் முதலில் ஆஸ்திரேலியா பேட் செய்தது. இந்தியப் பந்து வீச்சாளர்கள் இதுவரை இல்லாத அளவு மிகச் சிறப்பாக பந்து வீசினர். இந்தியாவின் பந்து வீச்சைச் சமாளிக்க முடியாமல், குறிப்பாக பிரவீன் குமார்,வினய் குமார், ரவீந்திர ஜடேஜா ஆகியோரின் பந்து வீச்சு சிறப்பாக இருந்தது.

இதனால் பெரிய அளவில் ரன் சேர்க்க முடியாமல் தகர்ந்து வந்தது ஆஸ்திரேலியா. இறுதியில், 19.4 ஓவர்களிலேயே 131 ரன்களுக்கு ஆல் அவுட் செய்தது இந்தியா.

அதன் பின்னர் ஆட ஆரம்பித்த இந்தியாவுக்கு கம்பீர் நல்ல தொடக்கத்தைக் கொடுத்தார். அவருக்குத் துணையாக ஷேவாக்கும் பிரமாதப்படுத்தினார். இருவரும் சேர்ந்து 43 ரன்கள் குவித்த நிலையில் ஷேவாக் 23 ரன்களில் ஆட்டமிழந்தார்.

மறு முனையில் தொடர்ந்து கம்பீர் நிதானமாக ரன் சேர்த்து வந்தார். அவருக்குத் துணையாக விராத் கோஹ்லி வெளுத்துக் கட்டினார். அவரது பங்கு 31.

அதன் பின்னர் வந்த கேப்டன் டோணியும் இணைந்து பட்டையைக் கிளப்ப இந்திய ரசிகர்களிடம் வெற்றி சந்தோஷம் பரவத் தொடங்கியது. இருவரும் சேர்ந்து வேகமாக ரன்களைச் சேர்க்க ஆரம்பிக்கவே சீக்கிரமே வெற்றி வந்து விடும் என்ற நம்பிக்கை பிறந்தது.

ஆனால் கடைசி நேரத்தில் கடைசி ஓவரின்போது இந்தியா திடீர் பரபரப்பை ஏற்படுத்தியது. அது ஸ்கோர் 131 ஆக இருந்தபோது ஒரே ஒரு ரன் எடுக்க இந்திய வீரர்கள் தடுமாறினார். இதனால் வாய் வரை வந்த வெற்றியை ஆஸ்திரேலியர்கள் தட்டிப் பறித்து விடுவார்களோ என்ற டென்ஷன் பரவியது.

ஒரு வழியாக தட்டுத் தடுமாறி 2 பந்துகள் மீதமிருந்த நிலையில் வெற்றிக்குத் தேவையான ரன்னை எடுத்து கரை சேர்ந்தது இந்தியா.

இந்தியா ஸ்கோர்: கம்பீர் -56, ஷேவாக் -23, கோஹ்லி -31, டோணி -21.

2 விக்கெட்களை மட்டுமே இழந்து 135 ரன்களைக் குவித்து எட்டு விக்கெட் வித்தியாசத்தில் ஆஸ்திரேலிய தொடரில் தனது முதல் வெற்றியைப் பதிவு செய்தது இந்தியா.

ஆட்ட நாயகன் ஜடேஜா

குறைந்த ரன்களை விட்டுக் கொடுத்து ஒரு விக்கெட் வீழ்த்திய ரவீந்திர ஜடேஜா ஆட்ட நாயகனாக தேர்ந்தெடுக்கப்பட்டார்.

##*