அணு ஆயுதப் போரின் விளிம்பில் கொரிய தீபகற்பம்!

வடகொரியா இரண்டு ஏவுகணைகளை தனது நாட்டின் கிழக்கு கரையோரப் பகுதியை நோக்கி நகர்த்தி மறைத்து வைத்துள்ளதாக தென்கொரிய ஊடகமொன்று செய்தி வெளியிட்டுள்ளது.

இதனால் ஜப்பான் மற்றும் ஆசிய பசுபிக்கில் அமைந்துள்ள அமெரிக்க தளங்களுக்கு பாரிய அச்சுறுத்தல் நிலவுவதாக சுட்டிக்காட்டப்பட்டுள்ளது.



தென்கொரியா, அமெரிக்காவுடன் இணைந்து மேற்கொள்ளும் கூட்டுப்பயிற்சி நடவடிக்கைகளுக்கு வடகொரியா கடும் எதிர்ப்பு தெரிவித்து வந்தது.

அதன் எச்சரிக்கைக்கு இருநாடுகளும் செவி சாய்க்காத காரணத்தினால் வடகொரிய உடனடியாக அடுத்த கட்ட நடவடிக்கைகளில் இறங்கியது.

வட கொரியா தென்கொரியா மீது போர்ப் பிரகடனம் மேற்கொண்டதுடன் படைகளையும் தயார் நிலையில் வைத்தது.

மேலும் அமெரிக்க தளங்கள் மீது தாகுதல் நடத்த தமக்கு அனுமதியளிக்கப்பட்டுள்ளதாக அந்நாட்டு இராணுவம் நேற்று முன் தினம் அறிவித்தது.



இந்நிலையிலேயே வடகொரியா இரண்டு ஏவுகணைகளை தனது நாட்டின் கிழக்கு கரையோரப் பகுதியை நோக்கி நகர்த்தி மறைத்து வைத்துள்ளதாக தெரியவந்துள்ளது.

இதற்கு பதிலாக அமெரிக்காவும் பல்வேறு நடவடிக்கைகளை மேற்கொண்டுவருகின்றது.

தனது ஏவுகணை எதிர்ப்பு ஆயுதங்கள் உள்ளிட்ட இராணுவ தளபாடங்களை கொரிய தீபகற்பத்தை நோக்கி அமெரிக்கா நகர்த்தி வருகின்றது.



இதனால் கொரிய தீபகற்பத்தில் எந்நேரமும் அணு ஆயுதப்போர் தொடங்கும் அபாயம் நிலவுவதாக ஆய்வாளர்கள் சுட்டிக்காட்டியுள்ளனர்.

தென்கொரிய இலக்குகளை விட அமெரிக்காவின் இராணுவத்தளங்களையே வடகொரியா குறிவைத்துள்ளதாக சுட்டிக்காட்டப்படுகின்றது.

வடகொரிய எத்தகைய ஏவுகணையை கிழக்கு கரையோரப் பகுதியை நோக்கி நகர்த்தியுள்ளது என்பது தொடர்பில் சந்தேகம் நிலவுகின்றது.

எனினும் கண்டம் விட்டு கண்டம் தாவும் சுமார் 3000 கிலோ மீற்றர்கள் வரை செல்லக்கூடிய முசுடன் ஏவுகணையையே வடகொரியா நகர்த்தியுள்ளதாக தென் கொரியா தெரிவித்துள்ளது.



மேலும் நீண்டநாட்களாக இயங்காமல் இருக்கும் அணு உலையொன்றினை மீண்டும் இயக்க முடிவுசெய்துள்ளதாக வடகொரியா அண்மையில் அறிவித்தமையானது தற்போதைய நிலையை மேலும் மோசமடையச் செய்துள்ளது.

ஆனால் வடகொரியாவிடம் அமெரிக்காவுடன் மோதுமளவிற்கு தேவையான அணு ஆயுதங்கள் இல்லையென ஒரு சாரார் தெரிவிக்கின்றனர்.

அணு ஆயுதம் தயாரிக்க தேவையான புளூடோனியம் மற்றும் யுரேனியம் அதனிடம் போதுமான அளவு இல்லையென்பதே அவர்களின் வாதமாகவுள்ளது.

எனினும் வடகொரியாவின் அணு ஆயுத கையிருப்பு தொடர்பான தகவல்கள் இதுவரை மர்மமாகவே உள்ளது.

நன்றி: வீரகேசரி -