கொலை குற்றச்சாட்டிலிருந்து எதிரி விடுதலை

தமது மச்சான் முறையான உறவினரை தலையில் துருவியால் அடித்து கொலை செய்தாரென நபர் ஒருவருக்கு எதிராக தொடரப்பட்ட வழக்கில் எதிரி விடுதலை செய்யப்பட்டார்.

வாழைச்சேனையைச் சேர்ந்த அருளானந்தம் மதிவதனன் என்பவர், அதே வாழைச்சேனை கொண்டையன் கேணியைச் சேர்ந்த மயில்வாகனம் உருத்திரன் எனும் தனது நெருங்கிய உறவினரை தலையில் துருவியால் அடித்து மரணத்தை விளைவித்தாரென குற்றஞ் சாட்டப்பட்டு மட்டக்களப்பு மேல் நீதிமன்றத்தில் வழக்கு தொடரப்பட்டிருந்தது.

07.08.2006 இல் இடம்பெற்ற குறித்த சம்பவம் தொடர்பில் தண்டனைச்சட்டக் கோவை 296 இன் கீழ் தண்டிக்கப்படத்தக்க கொலைக்குற்றம் புரிந்ததாக அருளானந்தம் மதிவதனன் மீது குற்றஞ்சாட்டப்பட்டு மட்டக்களப்பு மேல் நீதிமன்றத்தில் மேல் நீதிமன்ற நீதிபதி சந்திரமணி விஸ்வலிங்கம் முன்னிலையில் வழக்கு விசாரணை நடைபெற்று வந்தது.

இறுதியாக இந்த வழக்கு மேல் நீதிமன்ற நீதிபதி சந்திரமணி விஸ்வலிங்கம் முன்னிலையில் விசாரணைக்கு எடுத்துக்கொள்ளப்பட்ட போது எதிரியைக் குற்றச்சாட்டிலிருந்து விடுதலை செய்து தீர்ப்பு வழங்கினார்.

வழக்கு தொடுநர் தரப்பில் ஒன்பது சாட்சிகள் சாட்சியங்களை வழங்கியிருந்தாலும் கொலைச் சம்பவங்கள் நடக்கும்போது கண்ணால் கண்டதாக ஒருவரும் சாட்சியமளிக்கவில்லை என்றும் நியாயமான சந்தேகத்திற்கு அப்பால் கொலைக்குற்றச்சாட்டை நிரூபிக்கத் தவறியுள்ளதாகவும் நீதிபதி சந்திரமணி விஸ்வலிங்கம் தீர்ப்பில் தெரிவித்தார்.

மேலும், கொலையை எதிரிதான் செய்தாரென்பது மன்றுக்கு சந்தேகமிருப்பதால் அதன் பலனை எதிரிக்கு வழங்கி கொலைக்குற்றச்சாட்டிலிருந்து எதிரியை விடுதலை செய்வதாகவும் அவர் தீர்ப்பு வழங்கினார்.