அரபு நாடுகளின் பொம்மை ஆட்சியாளர்கள் அகற்றப்பட வேண்டும்; பாகிஸ்தானில் ஆர்ப்பாட்டம்

அரபு நாடுகளில் இடம்பெறும் மன்னராட்சிக்கு எதிரான ஆர்ப்பாட்டங்களை ஆதரித்து பாகிஸ்தானின் கராச்சியில் பாரிய மக்கள் பேரணி நடந்தது. இதில் ஆயிரக்கணக்கானோர் கலந்துகொண்டனர். ஜோர்தான், ஏமன், எகிப்து, லிபியா போன்ற நாடுகளில் நீண்ட காலமாக நிலவும் தனிநபர் ஆட்சிக்கு எதிரான மக்கள் போராட்டத்தை அந்நாடுகள் இராணுவ இரும்புக் கரங்களால் அடக்க முற்படுவதையும் ஆர்ப்பாட்டக்காரர்கள் கண்டித்தனர்.

மற்றும் அரபு முஸ்லிம் நாடுகளில் மேற்கு நாடுகளின் தலையீடுகள் அகற்றப்பட வேண்டுமென்று அவர்கள் கோஷமிட்டனர். மேற்கு நாடுகளின் பொம்மைகளாகவுள்ள அரபு ஆட்சியாளர்கள் அதிகாரத்திலிருந்து அகற்றப்பட வேண்டுமென்பதை கராச்சி ஆர்ப்பாட்டத்தில் கலந்துகொண்டோர் வற்புறுத்துகின்றனர்.

அரபு நாடுகளில் அண்மைக் காலமாக எழுந்துள்ள மக்கள் விழிப்புணர்வு குறித்து மத்திய கிழக்கு நாடுகள் உஷாரடைந்துள்ளதுடன் பாதுகாப்புகளையும் பலப்படுத்தியுள்ளன. அல் கைதா தலிபான்களின் வலையமைப்புகளூடாக இந்தப் போராட்டங்கள் முன்னெடுப்படுகின்றதா என்ற ஐயம் தற்போது சர்வதேச மட்டத்தில் எழுந்துள்ளது. மேற்கு நாடுகள் அது தொடர்பாக கூடிய கவனம் செலுத்தியுள்ளது.