பார்வை குறைபாடு

by *சம்ஸ் Tue 24 May 2011 - 22:40

என் மகனுக்கு எட்டு வயதாகிறது. அதற்குள்ளாக கண்ணாடி அணிய வேண்டிய நிலை. பார்வை குறைபாடு என்றாலே, கண்ணாடி, அறுவை சிகிச்சை போன்றவைதான் தீர்வுகளா? வேறு வழிகளில் இந்த குறைபாட்டை சரி செய்ய இயலுமா?

இது எண்ணற்ற பெற்றோர்களின் உள்ளத்து கேள்வி.
பொதுவாக பார்வை திறன் குறைபாடு ஏற்படுவதற்கு சத்து குறைச்சல், பரம்பரை ஆகியவை காரணமாக இருக்கலாம். பன்னிரண்டு வயதுக்குள் ஏற்படுகிற பார்வை திறன் குறைப்பாட்டை (ஆரம்ப கட்ட நிலையாக இருந்தால்) கண்ணாடி மற்றும் அறுவை சிகிச்சை இல்லாமலேயே, உணவு பழக்கம் மற்றும் சில வகை யோகாசன பயிற்சிகள் மூலம் சரி செய்ய இயலும்.
அதாவது, ஆறு வயதுக்குள் கண்டறியப்படும் குறைபாடுகளை ஏழு வயதுக்குள் சரி செய்ய முடியும். அதை தாண்டி பன்னிரண்டு வயது வரையிலான குழந்தைகளுக்கு கண்ணாடி அணிவதை தவிர்க்க முடியாது. அதேசமயம், உணவு பழக்கத்தை கடைப்பிடிப்பதன் மூலம் மேற்கொண்டு, "பவர்' கூடுவதை கட்டுப்படுத்தலாம்.
பன்னிரண்டு வயதுக்கு மேற்பட்டவர்களாக இருந்தால், மேலே சொன்ன சாப்பாடு மற்றும் யோகாசன முறைகளை பின்பற்றுவதன் மூலம், "பவர் கூடுதல்' போன்ற அடுத்தகட்ட பிரச்னைகள் ஏற்படாமல் தடுக்கலாம். கண்களுக்கு மிகவும் தேவையான "பீட்டா கரோட்டின் சத்துகள்' நம்முடைய உணவில் குறைவதாலேயே இத்தகைய பிரச்னைகள் ஏற்படுகின்றன.
"பாலிஷ்டு ரைஸ்' எனப்படும் பட்டை தீட்டப்பட்ட அரிசியில் இந்த சத்து மிகவும் குறைவு. ஆனால், அதைதான் இப்போது நாம் தினசரி சாப்பிடுகிறோம். எனவே, பீட்டா கரோட்டின் அதிகமுள்ள தினை அரிசியை சாதமாக தினமும் சேர்த்து கொள்ளலாம்.
இதேபோல் கேரட்டிலும் அதிகமாக பீட்டா கரோட்டின் சத்து உள்ளது. அடுத்தபடியாக முருங்கைக்கீரையை வாரத்துக்கு மூன்று நாட்கள் உணவில் சேர்த்து கொள்ளலாம். "கலர்டு புட்ஸ்' என்று சொல்ல கூடிய நிறமுள்ள உணவுகளான பப்பாளி, தக்காளி, அன்னாசி போன்றவற்றை தொடர்ச்சியாக சாப்பிடலாம்.
பெரும்பாலும் தற்போது குழந்தைகளை தினசரி தலை குளிக்க வைப்பதே இல்லை. அதேபோல எண்ணெய் குளியலும் செய்வதில்லை. இதுபோன்ற காரணங்களால் உடல் சூடு ஏற்பட்டு, அது பித்தமாக மாறிவிடுகிறது. இதனாலும் பார்வை திறன் குறைபாடு ஏற்படலாம். எனவே, தினசரி தலைக்கு குளிக்க வைப்பது முக்கியம். அதேபோல வாரம் ஒரு முறையாவது எண்ணெய் குளியல் செய்ய வேண்டும். இதை சொன்னதுமே, "சளி பிடிக்குமே' என்று சொல்வார்கள். அதில் எந்த உண்மையும் இல்லை. குளித்துவிட்டு சரிவர துடைக்காததாலும், வியர்வையோடு குளிப்பதாலும், வேறு சில காரணங்களாலும்தான் சளி பிடிக்கும். ஆறு வயதுக்குள் பார்வை குறைபாடு கண்டறியப்பட்டு விட்டால், இதையெல்லாம் பின்பற்றினாலே கண்ணாடி போட வேண்டிய அவசியம் இருக்காது.

நன்றி தினமலர்