இங்கிலாந்து தொடரில் அவரை சதமடிக்க விடமாட்டோம்

சச்சின் டெண்டுல்கரை இந்தத் தொடரில் 100-வது சதம் எடுக்க விடமாட்டோம்
என்று இங்கிலாந்து ஆஃப் ஸ்பின்னர் கிரகாம் ஸ்வான் தெரிவித்துள்ளார்.

முதல் டெஸ்ட் போட்டி வரும் வியாழனன்று லார்ட்ஸில் தொடங்குகிறது. சச்சின் சர்வதேச கிரிக்கெட்டில் தனது 100-வது சதத்தை எதிர்நோக்கி காத்திருக்கிறார். ஆனால் சச்சின் டெண்டுல்கரே தான் 100-வது சதத்திற்காக ஒருபோதும் சுய நெருக்கடி கொடுத்துக் கொள்ளப்போவதில்லை என்று கூறியிருக்கிறார்.

இந்த நிலையில் கிரகாம் ஸ்வான் கூறுகையில், "இந்தப் போட்டியில் சச்சினை வீழ்த்த வேண்டும் என்ற எண்ணத்தோடு மட்டுமே விளையாடுவது மிகவும் ஆபத்தானது. நவீன காலத்தில் சச்சின் மிகச்சிறந்த வீரர்தான். அதுபற்றி அவருடைய சாதனைகளே சொல்கின்றன. இந்திய அணியில் சச்சின் மட்டுமின்றி நிறைய முன்னணி வீரர்கள் உள்ளனர். அதனால் அவரை மட்டும் இலக்காக வைத்து விளையாடினால் மற்ற வீரர்கள் சிறப்பாக ஆடி ரன் குவித்துவிடுவார்கள் என்றார்.

சச்சினின் 100-வது சதம் குறித்துப் பேசிய ஸ்வான், அவர் கடந்த காலங்களில் லார்ட்ஸ் மைதானத்தில் சிறப்பாக விளையாடியதில்லை. பல காலங்களுக்கு முன்பே அவருடைய ஆட்டத்தை தொலைக்காட்சியில் பார்த்து உள்ளேன். ஆனால் இப்போதும் அவர் சிறப்பாக விளையாடிக் கொண்டிருக்கிறார். இப்போது 100-வது சதத்தை அடிக்கக் காத்திருக்கிறார். ஆனால் அதற்கு அவர் இன்னும் 6 அல்லது 7 மாதங்கள் காத்திருக்க வேண்டும் என்று நினைக்கிறேன். இங்கிலாந்து தொடரில் அவரை சதமடிக்க விடமாட்டோம் என்றார். தோனி குறித்துப் பேசிய ஸ்வான், அவர் மற்ற வீரர்களைவிட மிக முக்கியமான வீரர். முன்வரிசையில் களமிறங்கி விளையாடினால் எதிரணிக்கு அபாயகரமான பேட்ஸ்மேனாக இருப்பார் என்றார்.