saturangam சதுரங்கம்

by **நண்பன்** Sat 15 Oct 2011 - 10:52

அரசியல்வாதிகள் சமூக விரோதிகளின் நிழல் உலக வாழ்க்கையை பரபரப்பான
செய்தியாக்கும் பத்திரிகை நிருபர் ஸ்ரீகாந்த். ஜெயிலுக்குள் புகுந்து அங்கு
நடக்கும் முறைகேடுகளையும் அம்பலப்படுத்துகிறார். இதனால் ஜெயில்
சூப்பிரண்டு பதவிபறி போகிறது. சிறைத்துறை மந்திரியும் டிஸ்மிஸ்
ஆகிறார்.ஸ்ரீகாந்தால் பாதிக்கப்படுபவர்கள் பழிவாங்க தருணம் பார்க்கின்றனர்.

கல்லூரி மாணவி சோனியா அகர்வாலுக்கும்
ஸ்ரீகாந்துக்கும் காதல் மலர்கிறது. திருமணத்துக்கும் தயாராகின்றனர்.
அப்போது சோனியா கடத்தப்படுகிறார். கடத்தியது யார்? அவர் மீட்கப்பட்டாரா?
என்பது மீதி கதை... துடிப்பான பத்திரிகை நிருபர் கெட்டப்பில் கச்சிதமாய்
பொருந்துகிறார் ஸ்ரீகாந்த். பஸ்சில் டிக்கெட் எடுக்காமல் கைதாகி ஜெயிலுக்கு
போய் உள்ளே நடக்கும் அக்கிரமங்களை செய்தியாக்குவது... காதலி
கடத்தப்பட்டதும் அவரை தேடி அலைவது... விறு விறுப்புகள். போலீஸ் உதவி
இல்லாமலேயே கடத்தல்காரர்களை பிடிக்க துப்பு துலக்கி முன்னேறுவது
ஈர்க்கிறது.

அடிதடியில் வேகம்... சோனியா அகர்வால்
மோதலும் காதலுமாய் பளிச்சிடுகிறார். கடத்தல்காரர்களிடம் இருந்து தப்பிக்க
போராடி அனுதாபம் அள்ளுகிறார். பிதாமகன் மகாதேவன், மணிவண்ணன், ஸ்ரீமன்
கேரக்டர்களும் நேர்த்தி. கடத்தல்காரன் யார்? என்பதில் ஒவ்வொருவராக
சந்தேகப்பட வைத்து திரைக்கதையை பரபரவென நகர்த்துகிறார் இயக்குனர் கரு.
பழனியப்பன். சில சீன்களில் நாடகத்தனம் எட்டி பார்க்கிறது. வித்யாசாகர்
இசையில் பாடல்கள் இனிமை திவாகரின் ஒளிப்பதிவு அம்சம்.