ஓட்டுக்கு பணம் விவகாரம், அனைத்து தகவலும் என்னிடம் உள்ளது: அமர்சிங் புது குண்டு

by **நேசமுடன் ஹாசிம்** Wed 9 Nov 2011 - 6:03

ஓட்டுக்கு பணம் கொடுத்த விவகாரம் தொடர்பான அனைத்துத் தகவல்களும் என்னிடம் உள்ளன. தற்போது, இந்த வழக்கு கோர்ட்டில் உள்ளதால், இதுகுறித்த விவரங்களைத் தெரிவிக்க மாட்டேன்' என, ராஜ்யசபா எம்.பி., அமர்சிங் கூறினார்.பார்லிமென்ட்டில், கடந்த 2008ல் நம்பிக்கை ஓட்டெடுப்பு நடந்தபோது, அரசுக்கு ஆதரவாக ஓட்டளிப்பதற்கு, எம்.பி.,க்களுக்கு பணம் தரப்பட்டதாகப் புகார் எழுந்தது.

இந்த வழக்கு தொடர்பாக, சமாஜ்வாடி கட்சியின் முன்னாள் பொதுச் செயலரும், ராஜ்யசபா எம்.பி.,யுமான அமர்சிங் உள்ளிட்ட, பலர் கைது செய்யப்பட்டனர். இவர்களில், அமர்சிங் மட்டும், மருத்துவ சிகிச்சை பெறுவதற்காக, ஜாமினில் விடுவிக்கப்பட்டுள்ளார். இந்நிலையில், செய்தியாளர்களிடம், நேற்று அவர் கூறியதாவது:நம்பிக்கை ஓட்டுக்கு பணம் கொடுத்த விவகாரம் தொடர்பான அனைத்து தகவல்களும் என்னிடம் உள்ளன. ஆனாலும், இந்த வழக்கு தற்போது கோர்ட்டில் உள்ளதால், இதுபற்றிய விவரங்களை வெளியில் தெரிவிக்க மாட்டேன். நீதித் துறையின் மீது, எனக்கு முழு நம்பிக்கை உள்ளது.சமாஜ்வாடி கட்சியை சேர்ந்த சிலர், இந்த விவகாரத்தில் எனக்கு எதிராக அவதூறு பிரசாரம் செய்கின்றனர். இருந்தாலும், இதைப் பற்றி வெளிப்படையாக எந்தக் கருத்தும் தெரிவிக்க மாட்டேன். வரும் 15 அல்லது 16ம் தேதியில், மருத்துவ சிகிச்சைக்காக சிங்கப்பூர் செல்லவுள்ளேன். எனக்கு சிகிச்சை அளிக்கும் டாக்டர், அமெரிக்கா சென்றுள்ளதால், நான் சிங்கப்பூர் செல்வது தாமதமாகி விட்டது. என்னுடைய பயண விவரம் குறித்து, கோர்ட்டில் தெரிவித்து விட்டேன்.உ.பி., மாநிலத்தைப் பிரித்து, பூர்வாஞ்சல் தனி மாநிலம் அமைக்க வேண்டும். சிறிய மாநிலங்களாகப் பிரிப்பதன் மூலமே, வளர்ச்சிப் பணிகளை முழு வீச்சில் மேற்கொள்ள முடியும்.

உ.பி., சட்டசபையில் தீர்மானம் நிறைவேற்றினால் தான், தனி மாநிலம் அமைக்க முடியும். இதற்கான நடவடிக்கைகளை, உ.பி., முதல்வர் மாயாவதி மேற்கொள்ள வேண்டும்.இவ்வாறு, அமர்சிங் கூறினார்.முன்னாள் பிரதமர், மறைந்த நரசிம்மராவுக்கு எதிராக, ஜார்க்கண்ட் முக்தி மோர்ச்சா கட்சியினருக்கு, லஞ்சம் கொடுத்ததாக வழக்கு தொடரப்பட்டது. மற்றொரு வழக்கில், பா.ஜ., மூத்த தலைவர் அத்வானிக்கு எதிராகவும், குற்றம் சாட்டப்பட்டது. இவர்கள் எல்லாம், அரசியலில் பிரகாசிக்கவில்லையா. அதேபோல், எனக்கு எதிராக வழக்கு தொடுக்கப்பட்டாலும், அது, என் அரசியல் எதிர்காலத்தை எந்த வகையிலும் பாதிக்காது.