ஈராக்கில் 40 இந்தியர்கள் மாயம்: மீட்பு நடவடிக்கையில் அரசு தீவிரம்

புதுடில்லி : ஈராக்கில் கடத்தப்பட்டதாக கூறப்படும் 40 இந்தியர்களை மீட்கும் நடவடிக்கையில் மத்திய அரசு தீவிரமாக இறங்கி உள்ளது. ஈராக்கின் மோசூல் நகரில் நடைபெற்ற கலவரத்தில் ஜூன் 10ம் தேதியன்று பயங்கரவாதிகளால் கடத்தப்பட்டதாக கூறப்படும் 40 இந்தியர்கள் மட்டுமின்றி ஈராக்கில் சிக்கி தவிக்கும் இந்தியர்கள் பலரையும் மீட்க தேவையான அனைத்து நடவடிக்கைகளும் மேற்கொள்ளப்பட்டு வருவதாக மத்திய வெளியுறவுத்துறை அமைச்சகம் தெரிவித்துள்ளது. இதற்காக ஈராக் தலைநகர் பாக்தாத்தில் 24 மணிநேர தொலைப்பேசி சேவை மையத்தையும் இந்திய அரசு நிறுவி உள்ளது.
அமைச்சகம் உறுதி : ஈராக்கில் மோசூல் நகரில் பணிபுரிந்து வந்த இந்தியர்கள் 40 பேரை ஜூன் 10ம் தேதி முதல் காணவில்லை எனவும், அவர்களின் தொடர்புகள் துண்டிக்கப்பட்டுள்ளதாகவும் இந்திய வெளியுறவுத்துறை அமைச்சக செய்திதொடர்பாளர் சையது அக்பருதீன் தெரிவித்துள்ளார். மேலும் அவர்களை மீட்க தீவிர நடவடிக்கை மேற்கொள்ளப்பட்டு வருவதாகவும், இத்தகைய சிக்கலான சூழ்நிலையில் அவர்கள் கடத்தப்பட்டதை உறுதி செய்ய முடியாது எனவும் அவர் தெரிவித்துள்ளார். ஈராக்கில் நடைபெற்று வரும் தாக்குதல்களில் இதுவரை எந்த இந்தியரும் தாக்கப்பட்டதாக தகவல் ஏதும் இல்லை எனவும் அவர் உறுதிபட தெரிவித்துள்ளார்.
இந்தியர்கள் கடத்தலா? : ஈராக்கில் சன்னி பயங்ரவாதி அமைப்பினர் அரசுக்கு எதிராக போர் நடத்தி வருகின்றனர். இதனால் மோசூல் உள்ளிட்ட பல நகரங்களில் வன்முறை சம்பவங்கள் அரங்கேறி வருகின்றன. மோசூல் நகரில் சுமார் ஆயிரக் கணக்கான இந்தியர்கள் ஒப்பந்த அடிப்படையில் கட்டுமான வேலை செய்து வருகின்றனர். இவர்கள் நேரடி ஒப்பந்தம் மூலம் அழைத்து செல்லப்பட்டுள்ளதாகவும், நிர்வாகத்தால் முறையாக பதிவு செய்யப்படாமல் அவர்கள் ஈராக் அழைத்து செல்லப்பட்டுள்ளனர் என்றும் கூறப்படுகிறது. இந்நிலையில், மோசூலில் பணியாற்றிய இந்தியர்கள் 40 பேரை கடத்திச் சென்றிருக்கக் கூடும் என அஞ்சப்படுகிறது.
அவசர தொலைப்பேசி சேவை : ஈராக்கில் சிக்கி தவிக்கும் இந்தியர்களையும், நாடு திரும்ப விரும்பும் இந்தியர்களையும் மீட்பதற்காக மத்திய வெளியுறவுத்துறை அமைச்சகம், அங்குள்ள தூதரகம் மூலம் ஏற்பாடு செய்து வருகிறது. இந்தியர்கள் குறித்து தகவல் தரவும், ஈராக்கில் இருந்து வெளியேற உதவி பெறவும், 24 மணிநேர கட்டுப்பாட்டு அறையை இந்திய அரசு அங்கு திறந்துள்ளது. மாயமாகி உள்ள 40 பேர் உள்ளிட்ட இந்தியர்கள் குறித்து தகவல் அறிந்தால் அந்த எண்ணிற்கு அழைக்குமாறு கூறப்பட்டுள்ளது. இவர்களை மீட்பதற்காக, இந்திய விமானப்படைக்கு சொந்மான விமானங்கள் தயார் நிலையில் வைக்கப்பட்டுள்ளன. கேரளாவைச் சேர்ந்த 46 நர்ஸ்களும் ஈராக்கில் சிக்கி உள்ளனர். தாங்கள் அங்கு கைதிகளைப் போன்று உள்ளதாகவும், தங்களை உடனடியாக மீட்குமாறும் அவர்கள் தகவல் அனுப்பி உள்ளனர்.
இந்தியர்கள் வசிக்கும் பகுதிகளின் நிலை குறித்து கண்காணிக்கப்பட்டு வருவதாகவும், இதனை அறிவதற்காக ஈராக்கிற்கு முன்னாள் இந்திய தூதர் சுரேஷ் ரெட்டி இன்று பாக்தாத் செல்ல உள்ளதாகவும் மத்திய வெளியுறவுத்துறை அமைச்சகம் தெரிவித்துள்ளது. இந்திய வெளியுறவுத்துறை அமைச்சகத்தை தொடர்பு கொள்வதற்கு +91 11 2301 2113, +91 11 2301 7905, +91 11 2301 4104 ஆகிய அவசர எண்களும், பாக்தாத்தில் உள்ள இந்திய தூதரகத்தை தொடர்பு கொள்வதற்கு +964 770 444 4899, +964 770 484 3247 ஆகிய எண்களும் தரப்பட்டுள்ளது. கடைசிச் செய்தி: ஈராக்கின் பஸ்ரா என்ற இடத்தில் சுமார் 1000 இந்தியர்கள் சிக்கி தவித்து வருவதாக தூதரகத்திற்கு தகவல் வந்துள்ளது. அவர்களை மீட்க ஏற்பாடுகள் செய்யப்பட்டு வருவதாக இந்திய வெளியுறவுத்துறை அமைச்சகம் தெரிவித்துள்ளது.

நன்றி: தினமலர்

அனைவரும் எந்த சிக்கலுமின்றி அவரவர் வீடு திரும்பிட நாம் பிராத்திப்போம்!

சில நாட்கள் முன் இராணுவத்தினர் 1700 பேரை சுட்டு கொன்று இணையத்தில் வெளியிட்டிருந்ததாய் அறிந்தேன். எவருக்கு கட்டுப்படாத மூலம் எங்கென இன்னும் அறியப்படாத கொடூர மனம் கொண்டவர்களாக இந்த தீவிர வாதிகள் இருக்கின்ரார்களாம்.

இந்தியர்களை கடத்திய விடயத்தில் அல்கொய்தாவே எதிர்பார்க்காத விடயம் என செய்தி வருகின்றது.

யாராயிருந்தாலும் பாதிக்கப்பட்டவர்கள் எந்த பிரச்சனையும் இன்றி வீடு திரும்ப பிராத்திப்போம்!

யாராயிருந்தாலும் பாதிக்கப்பட்டவர்கள்...

 எந்த பிரச்சனையும் இன்றி வீடு திரும்ப...

 நானும் இறைவனைப்  பிராத்திக்கிறேன்!