மாயாவதி அரசுக்கு தொடர்ந்தும் நெருக்கடி நிலை: வருமானத்திற்கு அதிகமாக சொத்து குவித்ததாக புகார்

மாயாவதி அரசுக்கு தொடர்ந்தும் நெருக்கடி நிலை:
வருமானத்திற்கு அதிகமாக சொத்து குவித்ததாக புகார்



சி.பி.ஐ. விசாரணை செய்ய சிபாரிசு

உத்தரபிரதேச மாநில பள்ளிக் கல்வி அமைச்சர் ரங்கநாத் மிஸ்ரா மீது, அளவுவிற்கு
அதிகமாக சொத்து சேர்த்துள்ளதாக, அம்மாநில லோக் ஆயுக்தா குற்றம் சாட்டியுள்ளதுடன்,
அவரை அமைச்சரவையில் இருந்து நீக்கவும் சிபாரிசு செய்துள்ளது.
உத்தர பிரதேசத்தில் ஆட்சி செய்யும் மாயாவதி அரசுக்கு, சோதனை மேல் சோதனை
வந்துகொண்டிருக்கிறது. அவரது அமைச்சரவையில் கால்நடைத்துறை அமைச்சராக பதவி வகித்த
அவத்பால் சிங், இலஞ்சம் வாங்கினார் என்றும், அவர் மீது குற்ற வழக்குகள் உள்ளன
என்றும், அம்மாநில லோக் ஆயுக்தா கூறியிருந்தது.
இதையடுத்து அவத்பால் சிங் யாதவ், கடந்த ஆண்டு ஓகஸ்ட் மாதத்தில் தனது பதவியை ராஜினாமா
செய்தார். அடுத்து, அறநிலையத்துறை மற்றும் ஹோமியோபதி மருத்துவத்துறை அமைச்சராக
இருந்த ராஜேஷ் திருபாதி மீது, நில அபகரிப்பு வழக்குகள் இருப்பதாக லோக் ஆயுக்தா
கூறியதையடுத்து கடந்த ஆண்டு டிசம்பரில் அவரது பதவி பறிக்கப்பட்டது.
இந்நிலையில், அம்மாநில பள்ளிக் கல்வித்துறை அமைச்சர் ரங்கநாத் மிஸ்ரா மீது, அளவுக்கு
அதிகமாக சொத்து சேர்த்துள்ளதாக தற்போது லோக் ஆயுக்தா குற்றம் சாட்டியுள்ளதுடன், அவரை
அமைச்சரவையில் இருந்து நீக்கவும் சிபாரிசு செய்துள்ளது. பள்ளிக் கல்வி அமைச்சர்
ரங்கநாத் மிஸ்ரா, அளவுக்கு மீறி சொத்து சேர்த்துள்ளார் என உத்திர பிரதேச மாநில லோக்
ஆயுக்தாவிடம் வழக்கறிஞர் பாதோஹி, சுவாமி பிரசாத் மிஸ்ரா, புகார் அளித்திருந்தனர்.
இந்த புகாரின் மீது லோக் ஆயுக்தா நீதிபதி என். கே. மெஹ்ரோத்ரா விசாரணை செய்தார்.
பின், நீதிபதி மெஹ்ரோத்ரா, தனது அறிக்கையை முதல்வர் மாயாவதிக்கு கடந்த திங்கட்கிழமை
அனுப்பி வைத்துள்ளார். அதில் பள்ளிக் கல்வி அமைச்சர் ரங்கநாத் மிஸ்ரா மீது
கூறப்பட்டுள்ள குற்றச்சாட்டு குறித்து விசாரணை செய்ததில், அளவுக்கு அதிகமாக அவர்
சொத்து சேர்த்துள்ளதும், கிராம சபை நிலத்தை சட்டவிரோதமாக அபகரித்துள்ளதும்
தெரியவந்துள்ளது.
எனவே, இலஞ்ச தடுப்பு சட்டத்தின் கீழ் அவரை சி.பி.ஐ. அல்லது கண்காணிப்புத் துறையினர்
விசாரணை செய்ய வேண்டும். மேலும், அமைச்சரை பதவி நீக்கம் செய்ய வேண்டும் என சிபாரிசு
செய்யப்பட்டுள்ளது. உத்தரபிரதேச அரசில் தற்போது மூன்றாவதாக, பள்ளிக் கல்வி அமைச்சரை
லோக் ஆயுக்தா நீதிபதி, பதவி விலகக் கூறியிருப்பது, முதல்வர் மாயாவதிக்கு சிக்கலை
ஏற்படுத்தி உள்ளது.

அரசியல் என்றாலே ஊழகிவிட்ட காலம்

:!.: :!.: