சவூதி அரேபியாவில் பணிப்பெண் ஒருவர் மரணம்; முகவரின் அனுமதிப் பத்திரம் ரத்து!

by **முனாஸ் சுலைமான்** Thu 12 Apr 2012 - 7:00

இலங்கை வெளிநாட்டு வேலைவாய்ப்பு பணியகத்தில் பதிவு செய்யாமல் சவூதி அரேபியாவுக்கு இலங்கை பணிப்பெண் ஒருவரை அனுப்பிய முகவரின் அனுமதிப் பத்திரத்தை பணியகம் நேற்று ரத்துச் செய்தது.

சவூதி அரேபியாவில் நடந்த திடீர் விபத்தொன்றில் பலியான கொஸ்கம பகுதியைச் சேர்ந்த வை.எம்.மினோலி என்ற பெண்ணை பணியகத்தில் பதிவு செய்யாமல் சட்ட விரோதமாக அனுப்பிய மருதானையிலுள்ள முகவர் நிறுவனமொன்றின் அனுமதிப்பத்திரமே ரத்துச் செய்யப்பட்டுள்ளது.

குறித்த மினோலி என்ற பெண் தற்கொலை செய்து கொண்டதாகவே சவூதி அரசு தெரிவித்துள்ளது. அத்துடன் அவரது மரண விசாரணையின் அறிக்கையின்படி உயரமான கட்டடமொன்றிலிருந்து பாய்ந்து தற்கொலை செய்து கொண்டுள்ளதாகவே பதிவாகியுள்ளது.

இவர் தற்கொலை செய்து கொள்வதற்கான காரணம் இதுவரை கண்டறியப்படவில்லை. இது தொடர்பாக விசாரணை முடுக்கி விடப்பட்டுள்ளது. குறித்த பெண்ணின் மரணம் தொடர்பான விசாரணைகள் யாவும் பூர்த்தியடைந்ததும் அவரை அனுப்பிய வெளிநாட்டு வேலை வாய்ப்பு முகவருக்கு எதிராக பணியகத்தின் சட்டங்களுக்கு அமைய சட்ட நடவடிக்கை எடுக்கப்படுமென பணி யகத்தின் தலைவர் அமல் சேனா திலங்கார தெரிவித்தார்.
Share this post